• Home »
  • Sinhala »
  • ජිනීවා යෝජනා දෙකකින් රජය ඉවත්වෙයි

ජිනීවා යෝජනා දෙකකින් රජය ඉවත්වෙයි

dinesh-1

(Courtesy of Lanka Lead News)

යහපාලන ආණ්ඩුව 2015 සහ 2016 වසරවල දී ජිනීවා මානව හිමිකම් කොමිෂන් සභාව සමග එකඟතාවකට එළඹුණු 30 – 1 සහ 40 – 1 යන යෝජනා දෙකෙන් වහාම ඉවත් වීමට රජය තීරණය කර තිබේ.

ජනාධිපති කාර්යාලයේ දී ඊයේ (17) උදෑසන මේ සම්බන්ධයෙන් විශේෂ රැස්වීමක් පවත්වා ඇත.

ජනාධිපතිවරයා විසින් කැඳවන ලද මෙම රැස්වීමට විදේශ සබඳතා අමාත්‍ය දිනේෂ් ගුණවර්ධන සහ විදේශ අමාත්‍යාංශයේ ජ්‍යෙෂ්ඨ නිලධාරීන් මෙන්ම රජයේ මැති ඇමැතිවරුන් පිරිසක් ද සහභාගි වූහ.

පවත්නා දේශපාලන වාතාවරණය යටතේ ඉහත කී යෝජනා දෙක ක්‍රියාත්මක කිරීම වත්මන් රජයේ දේශපාලන ප්‍රතිපත්තිය හා නොගැළපෙන බැවින් එම යෝජනා දෙකෙන් ඉවත්වීමට රජය තීරණය කර ඇත.

යහපාලන ආණ්ඩුව 2015 සහ 2016 වසරවල මෙම යෝජනා දෙක ජිනීවා මානව හිමිකම් කොමිසමට ඉදිරිපත්කොට ඊට අනුග්‍රාහකත්වය ලබාදී තිබේ.

එහෙත් මෙම යෝජනා පාර්ලිමේන්තුවට හෝ කැබිනට් මණ්ඩලයටවත් ඉදිරිපත් කොට අනුමැතිය ලබාගෙන නොතිබූ බව ඊයේ පැවැති සාකච්ඡාවේ දී අනාවරණය වී ඇත.

මෙම යෝජනා දෙක මගින් පොදුවේ අපේක්ෂා කර ලද්දේ පවත්නා ව්‍යවස්ථානුකූල තත්ත්වය අභිබවා යන පුළුල් ලෙස බලය බෙදාහැරීමකි.

විධායක ජනාධිපති ධුරය අහෝසි කිරීම, යුද අපරාධ චෝදනා ලත් හමුදා සෙබළුන්ට එරෙහිව නීතිය ක්‍රියාත්මක කිරීම හා නඩු පැවරීම, ත්‍රස්තවාදය වැළැක්වීමේ පනත අහෝසි කිරීම සහ අතුරුදන්වූවන් සම්බන්ධ කාර්යාලයක් ස්ථාපිත කිරීම මෙම යෝජනා දෙකට ඇතුළත් වන කාර්යයන් වෙයි.

මෙම හේතු නිසා අදාළ යෝජනා දෙකෙන් රටට යහපතක් නොවන බැවින් ඉන් ඉවත්වීමට රජය තීරණය කර තිබෙන අතර, ලබන සතියේ දී විදේශ සබඳතා අමාත්‍යවරයා ජිනීවා මානව හිමිකම් සමුළුවට ගොස් රජයේ එම තීරණය නිල වශයෙන් ප්‍රකාශ කිරීමට ද නියමිතය.

එය ඊට පෙර අමාත්‍ය මණ්ඩලයටත්, පාර්ලිමේන්තුවටත් ඉදිරිපත් කිරීමට නියමිතය.

109 Viewers