• Home »
  • Sinhala »
  • යෝජිත ප‍්‍රති ත‍්‍රස්ත පනත සම්මත වුණොත් ත‍්‍රස්ත මර්දනයට මරු පහරක් වදිනවා…මේක ත‍්‍රස්තවාදීන්ට ලබාදෙන අංග සම්පූර්ණ සහන පැකේජයක් – විපක්‍ෂ නායක මහින්ද රාජපක්‍ෂ

යෝජිත ප‍්‍රති ත‍්‍රස්ත පනත සම්මත වුණොත් ත‍්‍රස්ත මර්දනයට මරු පහරක් වදිනවා…මේක ත‍්‍රස්තවාදීන්ට ලබාදෙන අංග සම්පූර්ණ සහන පැකේජයක් – විපක්‍ෂ නායක මහින්ද රාජපක්‍ෂ

(Courtesy of Divaina)

mahinda
යෝජිත ප‍්‍රති ත‍්‍රස්ත පනත ත‍්‍රස්තවාදීන්ට ලබාදෙන අංග සම්පූර්ණ සහන පැකේජයක් බවත් එය සම්මත වුවහොත් පාස්කු ඉරිදා සිදුවූ ප‍්‍රහාර සම්බන්ධව ත‍්‍රස්තවාදය මර්දනය කිරීම සඳහා සිදුවෙමින් පවතින මෙහෙයුම්වලට මරු පහරක් වනු ඇතැයි විපක්‍ෂ නායක මහින්ද රාජපක්‍ෂ මහතා නිවේදනයක් නිකුත් කරමින් ප‍්‍රකාශ කර සිටියි.

එම නිවේදනය මෙසේය.

වත්මන් ආණ්ඩුව 2015 ඔක්තෝබර් මාසයේදී අංක 30/1 දරණ එක්සත් ජාතීන්ගේ මානව හිමිකම් කවුන්සිලයේ යෝජනාවෙන් තම විදේශීය හාම්පුතුන්ට දුන් එක් ප‍්‍රධාන ප‍්‍රතිඥාවක් වූයේ 1979 ත‍්‍රස්තවාදය වැළැක්වීමේ පනත අහෝසි කොට ඒ වෙනුවට වෙනත් නීතියක් සම්මත කරන බවයි. මේ සඳහා ඔවුන් පාර්ලිමේන්තුවට ඉදිරිපත් කර තිබෙන ඊනියා ප‍්‍රති-ත‍්‍රස්ත පනත් කෙටුම්පත දේශපාලන හා මාධ්‍ය ක‍්‍රියාකාරීන්ගේ දැඩි විවේචනයට ලක් වී ඇත. ඔවුන් පෙන්වා දෙන්නේ මේ පනත් කෙටුම්පතේ ‘ත‍්‍රස්තවාදය’ යන්න නිර්වචනය කර තිබෙන ආකාරය නිසා සාධාරණ හා යුක්ති සහගත දේශපාලන හා වෘත්තීය සමිති ක‍්‍රියාකාරකම් මෙන්ම මාධ්‍ය විසින් තොරතුරු ප‍්‍රසිද්ධ කිරීමත් එම තොරතුරු වල මූලාශ‍්‍ර පිළිබඳ රහස්‍යභාවය රැකීමත් ත‍්‍රස්තවාදය හැටියට සැලකීමට ඉඩ ලැබෙන බවයි.

පාස්කු ඉරිදා බෝම්බ ප‍්‍රහාර වලින් පසු, එම ප‍්‍රති-ත‍්‍රස්ත පනත් කෙටුම්පතේ විධිවිධාන වලට අනුව ශ‍්‍රී ලාංකීය පුරවැසියන් විදේශීය ත‍්‍රස්තවාදී සංවිධාන සමඟ සම්බන්ධකම් ඇතිකර ගැනීම තහනම් කළ හැකි බව කියමින් ආණ්ඩුව එයට ජනතාවගේ අනුමැතිය ලබා ගැනීමට උත්සාහ ගනිමින් සිටින ආකාරය අපට පෙනේ. නමුත් ආණ්ඩුවේ මෙම ප‍්‍රති-ත‍්‍රස්ත පනත් කෙටුම්පත විරෝධකල්පික දේශපාලන ක‍්‍රියාකාරීත්වයට හා මාධ්‍ය නිදහසට අකුල් හෙළීම තුළින් සාමාන්‍ය පුරවැසියන් දඬුකඳේ ගසන අතරම, ත‍්‍රස්තවාදීන්ට සුවිශේෂ බුරුලක් ලබා දෙන ආකාරයට සකස් කර ඇත. ත‍්‍රස්තවාදීන්ට ලබාදෙන බුරුල නිසා එමඟින් සැබවින්ම සිදුවන්නේ ත‍්‍රස්තවාදය වැළැක්වීම නොව ත‍්‍රස්තවාදීන්ට ආරක්ෂාව ලබාදී ත‍්‍රස්තවාදය තවත් දිරි ගැන්වීමය.

අපේ දණ්ඩ නීති සංග‍්‍රහයට අනුව එක් පුද්ගලයෙක් ඝාතනය කළ අයෙකුටත් මරණ දණ්ඩනය හිමි වේ. නමුත් යෝජිත ප‍්‍රති-ත‍්‍රස්ත පනතට අනුව පුද්ගලයන් සිය ගණනක් නැතිනම් දහස් ගණනක් වුවත් ඝාතනය කිරිමේ චෝදනාවකට වරදකරු වන ත‍්‍රස්තවාදියෙකුට දිය හැකි උපරිම දඬුවම වන්නේ ජීවිතාන්තය දක්වා සිර දඬුවමකි. දණ්ඩ නීති සංග‍්‍රහයට අනුව මිනී මැරීමට ආධාර හා අනුබල දීමටත් මරණ දණ්ඩනය හිමිවුවද යෝජිත නීතිය යටතේ මහා පරිමාණ ඝාතන වලට ආධාර හා අනුබල දීමට වුවත් හිමිවන උපරිම දඬුවම වන්නේ අවුරුදු 15ක උපරිම සිර දඬුවමක් හා රුපියල් දසලක්ෂයක උපරිම දඩයකි. යම් වරදකට රටේ සාමාන්‍ය පුරවැසියන්ට හිමිවෙන දඬුවම්වලටත් වඩා බෙහෙවින්ම ලිහිල් දඬුවම් ත‍්‍රස්තවාදීන්ට ලබා දීමෙන් ත‍්‍රස්තවාදය අධෛර්යමත් කළ හැකිද?

යෝජිත ප‍්‍රති-ත‍්‍රස්ත පනත යටතේ අත්අඩංගුවට ගනු ලබන ත‍්‍රස්තවාදී සැකකරුවන්ට ඉතාමත්ම යහපත් ලෙස සැලකීමට පොලීසිය හා සන්නද්ධ හමුදා බැඳී සිටී. සන්නද්ධ හමුදා විසින් අත්අඩංගුවට ගන්නා ත‍්‍රස්තවාදී සැකකරුවන් පැය 24ක් ඇතුළත ළඟම තිබෙන පොලිස් ස්ථානයේ ස්ථානාධිපතිවරයාට බාරදිය යුතු වේ. එම ස්ථානාධිපතිවරයා අදාළ සැකකරුගේ සිරුරේ තුවාල තිබේදැයි පරීක්ෂාකොට බලා ඔහුව අධිකරණ වෛද්‍ය නිලධාරියෙකු වෙත ඉදිරිපත් කළ යුතු වේ. එම අත්අඩංගුවට ගැනීම තුළින් සැකකරුගේ මූලික අයිතීන් උල්ලංඝනය වී තිබෙනවාද නැද්ද යන්න ගැන සොයා බැලීම සඳහා අත්අඩංගුවට ගැනීම සිදු වී පැය 24ක් ඇතුළත ඒ බව ශ‍්‍රී ලංකා මානව හිමිකම් කොමිසම වෙතද වාර්තා කළ යුතු වේ.

යම්කිසි ත‍්‍රස්තවාදී සැකකරුවකු අත්අඩංගුවට ගන්නා අවස්ථාවේදී අදාළ නිලධාරීන් තම අනන්‍යතාවය ත‍්‍රස්තවාදී සැකකරුවාට පමණක් නොව, එම අවස්ථාවේදී එතන සිටින ඔහුගේ පවුලේ අය නැතිනම් මිත‍්‍රයන්ටත් හෙළිකළ යුතු වෙයි. එවැනි නීතියක් මොවුන් ගෙන එන්නේ මේ රටේ ත‍්‍රස්තවාදීන් විසින් ආරක්ෂක හමුදා සාමාජිකයන්ගේ පවුල් බුරුතු පිටින් ඝාතනය කළ ඉතිහාසයද නොතකාය. සිරභාරයට ගනු ලබන ත‍්‍රස්තවාදී සැකකරුවන්ගේ පවුලේ සාමාජිකයන්ට හෝ වෙනත් අයට ඔහුව බැලීමට සාධාරණ අවකාශයක් යෝජිත පනත යටතේ ලබාදිය යුතු වේ. මේ ආකාරයට අත්අඩංගුවට පත් ත‍්‍රස්තවාදියෙකු බැලීමට එන පුද්ගලයා ඊළඟ මරාගෙන මැරෙන බෝම්බකරුවා වීමටත් ඉඩ තිබෙන වාතාවරණයක පවා මේ විධිවිධානය ක‍්‍රියාත්මක වේ.

යෝජිත පනත යටතේ ත‍්‍රස්තවාදියෙකු අත්අඩංගුවට ගන්නා මොහොතේ සිට ඔහුගේ යහපැවැත්ම අන් සියල්ලටම වඩා මුල් තැන ගනී. අත්අඩංගුවට ගන්නා සියලූ ත‍්‍රස්තවාදී සැකකරුවන් පැය 48 ක් ඇතුළත මහෙස්ත‍්‍රාත්වරයෙකු වෙත ඉදිරිපත් කළ යුතු වන අතර, එම සැකකරුවන්ගේ යහපැවැත්ම ගැන එම මහෙස්ත‍්‍රාත්වරයා පුද්ගලිකවම කරුණු විමසා බැලිය යුතු වේ. සැකකරුවෙකු රැඳවුම් භාරයේ තබාගත හැක්කේ සති දෙකක කාලයකට පමණි. රැඳවුම් භාරයේ සිටින කාලය දීර්ඝ කළ හැක්කේ මහෙස්ත‍්‍රාත්වරයෙකුගේ අනුමැතියට යටත්ව පමණි. ත‍්‍රස්තවාදී සැකකරුවෙකු රැඳවුම් භාරයේ තබාගත හැකි උපරිම කාලය සති 8ක් වේ. වර්තමානයේ බලපවත්වන ත‍්‍රස්තවාදය වැළැක්වීම පනත යටතේ නම් සැකකරුවෙකු මාස 03ක් රැඳවුම් භාරයේ තබාගත හැකි අතර එම කාලය මාස 18 ක් දක්වා දිර්ඝ කළ හැක.

යෝජිත නීතිය යටතේ සැකකරුවකු නඩු පැවරීමකින් තොරව රිමාන්ඞ් භාරයේ තබාගත හැකි උපරිම කාලය මාස 06 ක් වේ. මහාධිකරණ නියෝගයක් මත පමණක් එම කාලය තවත් මාස 06ක් දක්වා දීර්ඝ කළ හැක. නමුත් එම කාලය තුළද නඩු පැවරීමක් සිදු නොවුනහොත් අදාල සැකකරුවාව අනිවාර්යයෙන්ම ඇප මත නිදහස් කළ යුතුවේ. නමුත් වර්තමානයේ බලපවත්වන ත‍්‍රස්තවාදය වැළැක්වීමේ පනත යටතේ සැකකරුවෙකුට එරෙහිව නඩු පවරා අදාළ සියලූ කටයුතු අවසන් වනතුරු ඔහුව දිගටම රිමාන්ඞ් භාරයේ තබාගත හැකි වේ. යෝජිත නීතියට අනුව සැකකරුවන් රැඳවුම් භාරයේ හෝ රිමාන්ඞ් භාරයේ රඳවා තබා ඇති සියලූම ස්ථාන කලින් දැනුම් දීමකින් තොරව මානව හිමිකම් කොමිසම හා මහෙස්ත‍්‍රාත්වරුන් විසින් පරීක්ෂණයට ලක්කොට ත‍්‍රස්තවාදී සැකකරුවන්ගේ සුවදුක් සොයාබලා, ඔවුන්ගේ යහපැවැත්මට අවශ්‍ය සියලූම මූලික පහසුකම් අදාළ ආයතන විසින් සපයා දෙන බවට වගබලාගත යුතු වේ. මෙම යෝජිත පනත යටතේ රක්ෂිත බන්ධනාගාර ගතකොට ඇති ත‍්‍රස්තවාදී සැකකරුවෙකුට එරෙහිව ඇසෙන නඩුව අවුරුද්දක් තුළ අවසන් කිරීමට නොහැකි වුවහොත් ඔහුව ඇප මත නිදහස් කිරීමට මහාධිකරණය බැඳී සිටී.

නඩු පැවරීමෙන් පසුත් ත‍්‍රස්තවාදී චූදිතයන්ට විශේෂ සහන ලැබේ. යෝජිත ප‍්‍රති ත‍්‍රස්ත පනතට අනුව යම් කිසි ත‍්‍රස්තවාදියෙකුගේ ක‍්‍රියාකාරකම් නිසා කිසිවෙකුට මරණය හෝ බරපතළ ශාරීරික හානියක් සිදුවී නැත්නම් හා රාජ්‍ය ආරක්ෂාවට එම පුද්ගලයාගේ ක‍්‍රියාකාරම් තුළින් බරපතළ අගතියක් සිදුවී නැත්නම් හා අදාළ සැකකරුවා තමන් කළ දේ සම්බන්ධයෙන් ප‍්‍රසිද්ධියේ කනගාටුව ප‍්‍රකාශ කරන්නේ නම් හෝ වින්දිතයන්ට වන්දියක් ගෙවීමට එකඟ වන්නේ නම් හා පුනරුත්ථාපන වැඩසටහනකට සහභාගී වන්නේ නම්, නීතිපතිවරයාට එම සැකකරුට එරෙහිව තිබෙන නඩුව අත්හිටුවීමට නැත්නම් සම්පූර්ණයෙන්ම ඉවත් කිරීමට වුවද හැක.

‘කිසිවෙකුටත් හානියක් නොකළ’ එමෙන්ම රාජ්‍ය ආරක්ෂාවටත් අගතියක් සිදු නොකළ අයකු ප‍්‍රති-ත‍්‍රස්ත නීතියක් යටතේ අත්අඩංගුවට පත් වී උසාවියක චූදිතයෙකු බවටත් පත්විය හැක්කේ කෙසේද යන ප‍්‍රශ්නය මෙහිදී පැනනගී. ප‍්‍රායෝගිකව ගත්කල ත‍්‍රස්තවාදී සැකකරුවෙකුට එරෙහිව රටේ සාමාන්‍ය නීතිය යටතේ නඩුවක් පවත්වාගෙන යාමට තරම් සාක්ෂි එකතු කිරීම දුෂ්කර කටයුත්තකි. බොහෝවිට සාක්ෂි එකතු කිරීමට බාධා වන්නේ එම ත‍්‍රස්තවාදය නිසාම රටේ පවතින තත්ත්වයයි. යම්කිසි ත‍්‍රස්තවාදී සැකකරුවෙකු අත්අඩංගුවට ගෙන ඉන්පසු උසාවියක චෝදනා ගොනු කරනු ලැබූ පසුත් ඔහු කිසිවෙකුටත් හානියක් නොකළ එමෙන්ම රටේ ආරක්ෂාවටත් අගතියක් නොකළ අයෙකු හැටියට සැලකෙන්නේ නම් එයට හේතුව ඔහුගේ ක‍්‍රියාකාරකම් ගැන උසාවියට පිළිගත හැකි සාක්ෂි සොයා ගැනීමේ අසීරුතාවය පමණි. ඔහු චෝදනා ලැබ සිටින අපරාධය ඔහු නොකළාය යන්න ඉන් හැෙ`ගන්නේ නැත.

ආණ්ඩුවේ යෝජිත ප‍්‍රති-ත‍්‍රස්ත පනතින්ද ඒ යථාර්ථය පිළිගෙන ඇත. යම්කිසි ත‍්‍රස්තවාදී සැකකරුවකුට එරෙහිව ඇති චෝදනා පත‍්‍රය ඉල්ලා අස්කර ගැනීමට පෙර අදාළ චූදිතයා නීතියෙන් තමන් නොකළ බවට සැලකෙන අපරාධයකට ප‍්‍රසිද්ධියේ සමාව ගතයුතු බවටත් තමන් විසින් හානියක් නොකළ වින්දිතයන්ට වන්දි පවා ගෙවිය යුතු යැයි මේ ප‍්‍රති-ත‍්‍රස්ත පනතින්ම නියම කොට ඇත්තේ එම කාරණය නිසාය. යෝජිත ප‍්‍රති-ත‍්‍රස්ත පනතේ ඇති එවන් ජුගුප්සාජනක විධිවිධානවලින් වක‍්‍රව පිළිගෙන ඇත්තේ ත‍්‍රස්තවාදී සැකකරුවන් සාමාන්‍ය නීතිය යටතේ උසාවියක නඩු පවරා වරදකරු කිරීමට ඇති අසීරුතාවයයි. සාමාන්‍ය නීතිය යටතේ උසාවිය බලාපොරොත්තු වන සාක්ෂි භාරය ත‍්‍රස්තවාදයක් පවතින අවස්ථාවක ප‍්‍රායෝගික වන්නේ නැත.

මේ නිසා ත‍්‍රස්තවාදයට එරෙහිව ගෙන එනු ලබන නීති වලින් බොහෝ විට කළ හැක්කේ ත‍්‍රස්තවාදය මර්දනය කිරීම මිස ත‍්‍රස්තවාදීන්ට නීතියෙන් දඬුවම් දීම නොවේ. ත‍්‍රස්තවාදයට එරෙහිව යම් නීතියක් සම්මත කර ගන්නේ නම් එය අඩුම වශයෙන් ත‍්‍රස්තවාදය මර්දනය කිරීමේ මූලික අවශ්‍යතාවයවත් ඉටුකරගත හැකි ආකාරයට දැඩි විය යුතුය. 1979 දී එජාප අණ්ඩුව විසින් සම්මත කරනු ලැබූ ත‍්‍රස්තවාදය වැළැක්වීමේ පනත දැඩි නීතියක් බවට විවාදයක් නැත. නමුත් අපට මුහුරණ දීමට සිදුවූයේ ලෝකයේ කිසිම තැනක දක්නට නොලැබුණු තරමේ ම්ලේච්ඡු ත‍්‍රස්තවාදයකටය. එවන් දැඩි නීති නොමැතිව ඒ ආකාරයේ ත‍්‍රස්තවාදයක් පරාජය කිරීමට හැකි වන්නේ නැත.

යම්කිසි ත‍්‍රස්තවාදී චූදිතයෙකු උසාවියෙන් වරදකරු කළ පසුත් ත‍්‍රස්තවාදය ප‍්‍රසිද්ධියේ හෙළා දැකීම, වින්දිතයන්ට වන්දි ගෙවීම හා ප‍්‍රචණ්ඩත්වය ප‍්‍රසිද්ධියේම ප‍්‍රතික්ෂේප කිරීම වැනි කාරණා සැලකිල්ලට ගෙන අදාළ පුද්ගලයා කළ වරදට හිමි විය යුතු සිර දඬුවම අඩුකළ යුතු යැයි ආණ්ඩුවේ යෝජිත ප‍්‍රති-ත‍්‍රස්ත පනතේ සඳහන් වේ. ඒ අනුව මේ යෝජිත ප‍්‍රති-ත‍්‍රස්ත පනත ත‍්‍රස්තවාදීන්ට ලබාදෙන අංග සම්පූර්ණ සහන පැකේජයකි. මේ අවස්ථාවේදී මෙවන් පනතක් නීතියක් බවට පත්වුවහොත්, එය පාස්කු ඉරිදා බෝම්බ ප‍්‍රහාර වලින් පසු ත‍්‍රස්තවාදය මර්දනය කිරීමට සිදුවෙමින් පවතින මෙහෙයුම් වලට මරු පහරක් වනු ඇත. අපේ රට නැවතත් ත‍්‍රස්තවාදී උවදුරකට ගොදුරුවී ඇති නිසා මේ අවස්ථාවේදී 1947 මහජන ආරක්ෂක ආඥාපනතටත්, 1979 ත‍්‍රස්තවාදය වැළැක්වීමේ පනතටත් කිසිදු වෙනසක් සිදු නොවිය යුතුය. ත‍්‍රස්තවාදීන්ගේ අයිතීන් වලට වඩා මුල්තැන දිය යුතු වන්නේ ජනතාවගේ ජීවත් වීමේ අයිතිය සුරැකීමටය.



163 Viewers