• Home »
  • Sinhala News »
  • ඉන්දියාවේ සිට රැගෙන පැමිණි පුපුරණ ද්‍රව්‍ය තොගයක් මන්නාරමෙන් සොයාගනී

ඉන්දියාවේ සිට රැගෙන පැමිණි පුපුරණ ද්‍රව්‍ය තොගයක් මන්නාරමෙන් සොයාගනී

ඉන්දියාවේ සිට බෝට්ටු මගින් හොර රහසේ මෙරටට රැගෙන පැමිණි බව කියන පුපුරණ ද්‍රව්‍ය තොගයක් නාවික හමුදාව විසින් ලබාදුන් බුද්ධි තොරතුරකට අනුව විශේෂ කාර්ය බලකායේ ද සහය අතිව අද සවස සැකකරුවෙක්ද සමඟ අත්අඩංගුවට ගෙන තිබේ.

ඉන්දියාවේ VETRIVEL EXPLOSIVES PVT. LTD. ආයතනයේ නිෂ්පාදිත කරලක් ග්‍රෑම් 125 ක් බරකින් යුත් ඉමල්ෂන් වර්ගයේ උසස් පුපුරණ ද්‍රව්‍ය කරල් 7,990 ක් සොයාගත් පුපුරණ ද්‍රව්‍ය අතර ඇතැයි විශේෂ කාර්ය බලකාය සදහන් කරයි. එම පුපුරණ ද්‍රව්‍ය තොගයේ සම්පූර්ණ බර කිලෝ 998 යි ග්‍රෑම් 750 කි.

මන්නාරම ශාන්තිපුරම් ගෙවල් 100 ප්‍රදේශයේ නිවසක සඟවා තිබුණු මෙම පුපුරණ ද්‍රව්‍ය සමඟ අවුරුදු 55 ක් වයසැති පුද්ගයෙක්ද අත්අඩංගුවට ගෙන තිබේ. ඔහු ප්‍රනාන්දු ජෝෂප් නැමැති අයෙකි.

මෙම පුපුරණ ද්‍රව්‍ය අධිබල පුපුරණ ද්‍රව්‍ය ගණයට නොවැටෙන බවත් මේවා භාවිතා කරනුයේ ගල්වෙඩි දැමීමට බවත් ආරක්ෂක අංශයක පුපුරණ ද්‍රව්‍ය විශේෂඥයෙක් අප කළ විමසුමකදී සදහන් කළේය.

එය එසේ වූවත් මෙසේ පුපුරණ ද්‍රව්‍ය ඉන්දියාවේ සිට බෝට්ටු මගින් ආරක්ෂක අංශවලට හසුනොවන ලෙස ගොඩබිමට රැගෙන ඒම සම්බන්ධයෙන් සහ මේවා සැබෑ ලෙසම ගල්වෙඩි සදහා යොදා ගැනීමටමදැයි වැඩි දුර විමර්ශන මන්නාරම පොලිසීය විසින් සිදුකරයි.

තලෛමන්නාරම නාවික හමුදා කදවුරේ නිළධාරීන්ගෙන් මන්නාරම මුලස්ථාන ප්‍රධාන පොලිස් පරීක්ෂක වෙත ලැබුණු බුද්ධි තොරතුරකට අනුව විශේෂ කාර්ය බලකාය අණදෙන නිලධාරී නියෝජ්‍ය පොලිස්පති නීතිඥ වරුණ ජයසුන්දර මහතාගේ සෘජු අධීක්ෂණය හා යාපනය කලාප අණදෙන නිලධාරී ජ්‍යෙෂ්ඨ පොලිස් අධිකාරී ඩී.ඩී.ඩී.කේ. හෙට්ටිආරච්චි මහතාගේ මෙහෙයවීමෙන් විශේෂ කාර්ය බලකාය මන්නාරම කඳවුරේ ප්‍රධන පොලිස් පරීක්ෂක එන්.පී.ඒ.එස්. නිරෝෂන් ඇතුළු නිලධාරීන් කණ්ඩායමක්, විශේෂ කාර්ය බලකාය බෝම්බ නිෂ්ක්‍රීය අංශයේ නිලධාරීන් ද මන්නාරම පොලිස් ස්ථානයේ නිළධාරීන් සමඟ ඒකාබද්ධව මෙම වැටලීම කළ බව විශේෂ කාර්ය බලකා මාධ්‍ය අංශය සදහන් කළේය.



8 Viewers