මහානායක හාමුදුරුවෝ කියන දේ ඇත්ත !
දළදා මාළිගාවට බෝම්බ ගැහුවේ LTTE ත්‍රස්තවාදීන්. ඒ 1998 ජනවාරි 25.
ජවිපෙ සන්නද්ධ අංශය (දේශප්‍රේමී ජනතා ව්‍යාපාරය) කළේ දළදා මාළිගාවට වෙඩි තිබ්බ එක ! ඒ දළදා කරඬුව සහ එහි තිබූ රත්‍රන් හොරකම් කරන්න ගිහින්. ඒක වුනේ 1989 පෙබරවාරි 08 වැනිදා !
මේ 👇….. ඒ පිළිබඳව 2001 වර්ෂයේ The Sunday Leader පුවත්පතේ ඉංග්‍රීසි භාෂාවෙන් පළවී තිබූ ලිපියක සිංහල අනුවාදය.
“….ආතතිය වර්ධනය වීමත් සමඟ JVP සංවිධානය සහ එහි සන්නද්ධ අංශය වූ දේශප්‍රේමී ජනතා ව්‍යාපාරය රජයේ සහ සිවිල් ජනතාවට අයත් විවිධ ඉලක්ක වෙත ප්‍රහාර එල්ල කළහ. බොහෝ පොදු ස්ථාන විනාශ කරන ලද අතර, රජයට සහාය දක්වන බවට සැක කළ පුද්ගලයන්ට ද ප්‍රහාර එල්ල විය. මහනුවර නගර මධ්‍යයේ පිහිටි ශ්‍රී දළදා මාළිගාව ද 1989 පෙබරවාරි 8 වැනිදා ප්‍රහාරයකට ලක් විය. එම ප්‍රහාරයට සහභාගී වූ හිටපු JVP සාමාජිකයකුගේ සාක්ෂිය ඇතුළු ඇසින් දුටු සාක්ෂි මඟින් මෙම සිදුවීම පිළිබඳ සවිස්තර තොරතුරු අනාවරණය වේ.
එම ප්‍රහාරයට සහභාගී වූ අධිකාරි හෙවත් කෝසල නමැති හිටපු JVP සාමාජිකයකු සමඟ සම්මුඛ සාකච්ඡාවක් පැවැත්වීමට මෙම ලියුම්කරුට හැකිවිය. පක්ෂයේ පූර්ණ සාමාජිකයකු වූ අධිකාරි ආයුධ පුහුණුව ලබා තිබූ අතර, පල්ලේකැලේ හමුදා කඳවුරට එල්ල කළ ප්‍රහාරය, 1987 බෝගම්බර බන්ධනාගාර ප්‍රහාරය සහ දිගන බැංකු කොල්ලය ඇතුළු පක්ෂය වෙනුවෙන් සිදු කළ මෙහෙයුම් කිහිපයකට ද සහභාගී වී තිබුණි.
එම ප්‍රහාරය එල්ල කිරීම සැලසුම් කිරීම සඳහා සාකච්ඡාවක් 1989 පෙබරවාරි 07 වැනි දින පැවැත්විණි. එයට බස්නාහිර සහ සබරගමුව පළාත්වල JVP නායකයා වූ ඩී. එම්. ආනන්ද හෙවත් කළු අජිත් සහ පසුව JVP නායකයා බවට පත් වූ, කැරැල්ලෙන් පසු පක්ෂයේ දේශපාලන මණ්ඩලයේ (Politburo) ජීවත්ව සිටි අවසන් සාමාජිකයා වූ සෝමවංශ අමරසිංහ හෙවත් සනත් ද සහභාගී වූහ.
එම රැස්වීමේදී, දන්ත ධාතූන් වහන්සේ අත්පත් කරගැනීමෙන් පසු සඟවා තැබීම සඳහා සුදුසු ස්ථානයක් ලෙස අධිකාරි මැදමහනුවර ප්‍රදේශය යෝජනා කළේය.
ඊළඟ දිනය වූ පෙබරවාරි 8 වැනිදා පස්වරු 2.00ත් 2.30ත් අතර කාලයේ මහනුවර ක්වීන්ස් හෝටලය අසලට පැමිණෙන ලෙස ඔහුට දැනුම් දෙන ලදී. එහිදී ඔහුට දිගන බැංකු කොල්ලයට සහභාගී වූ තම සගයකු වන සරත් හමු විය. සරත් විසින් තරුණයන් සිව්දෙනකු සහ තරුණියන් දෙදෙනකු ඔහුට හඳුන්වා දෙන ලදී. සුදු පැහැති ළමා සාරිවලින් සැරසී සිටි තරුණියන් දෙදෙනා මල් පිරවූ තැටි දෙකක් රැගෙන සිටියහ.
අධිකාරිට පැවරී තිබූ කාර්යය වූයේ එම පිරිස දළදා මාළිගාවේ මකර තොරණ පිහිටි පිවිසුම වෙත රැගෙන යාමයි. එහිදී සාමාජිකයන් හඳුනාගැනීම සඳහා තම සාක්කුවල පෑන් රඳවාගෙන සිටින මහත්වරුන් දෙදෙනකු ඔහුට හමුවීමට නියමිතව තිබුණි. ඔහුට ලබා දී තිබූ උපදෙස් අනුව තම කාර්යය අවසන් කළ පසු, මහනුවර සිට කිලෝමීටර් පහක් පමණ දුරින් පිහිටි කුණ්ඩසාලේ නගරය වෙත ඔහු ගියේය. එහිදී ඔහු බලා සිටියේ දන්ත ධාතූන් වහන්සේ තැන්පත් කර තිබූ කරඬුව රැගෙන එන තෙක්ය. එහෙත් සැලැස්ම සාර්ථක වූයේ නැත.
අධිකාරිට පසුව දැනගැනීමට ලැබුණු තොරතුරු අනුව, තරුණියන් දෙදෙනා පිවිසුම අසල ආරක්ෂක මුරපොළ පසුකර ගොස් තිබුණේ නිසි පරීක්ෂාවකට ලක් නොවීමෙනි. ඔවුහු අනෙක් පිරිස පැමිණෙන තෙක් බලා සිටියහ. මෙය ආරක්ෂක නිලධාරියකුගේ සැකයට හේතු වූ අතර, ඔහු තරුණියන් දෙදෙනා වෙත පැමිණියේය.
ඒ වන විට කණ්ඩායමේ සෙසු සාමාජිකයන් ද එම ස්ථානයට පැමිණ සිටියහ. ඔවුහු මල් තැටි තුළ සඟවා තිබූ ගිනි අවි පිටතට ගෙන ආරක්ෂක නිලධාරීන්ට වෙඩි තැබූහ. ආරක්ෂක නිලධාරීහු ද ප්‍රතිප්‍රහාර එල්ල කළහ. එම වෙඩි හුවමාරුවේදී අවම වශයෙන් පුද්ගලයන් පස් දෙනෙකු මියගොස් එක් අයකු තුවාල ලැබීය. එමෙන්ම ආරක්ෂක අංශ සතු වූ T81 ගිනිඅවි 11ක් ද පැහැරගෙන තිබුනි….!”
3 Viewers
